Friday, June 8, 2012

Welcome to Jay's Quirky World

"Maligayang pagdating sa kaharian ng Jay's Quirky World!"

Ito ang isinigaw ng isang lalake. Nakatayo siya sa isang mataas na tore na nagbabakod sa malaki at napakagandang kastilyo na noon ko lang nakita matapos maglakbay ng malayo mula sa gubat.

Maraming tao ang makikitang nagkalat sa magandang kastilyo. Masasaya ang mga mukha nila at nagbigay pugay sila sa isang hari na nakasakay sa isang karwahe. Nakita kong gawa ito sa matataas na uri ng kahoy, bakal, marmol, at ginto.

Nagsimulang tumugtog ang mga banda na nangunguna sa karwahe ng hari. Napadaan sila sa harap ko at nang makakuha ng pagkakataong masilip ang loob nito, nakita ko ang maganda niyang reyna na nakangiti at kumakaway sa mga taong bumabati sa kanila ng maligayang pagbabalik.

Nasa likuran naman ang kanilang mga anak. Tatlong anak na prinsepe. Magkakatabi sila sa mahabang upuan na napakalambot at nakangiti ring kumakaway sa mga tao mula sa bintana. Napakaganda nilang pinagmamasdan.

Ang unang prinsepe ay may ngalang Peter.

Ang pangalawang prinsepe ay may ngalang Diego.

At ang huling prinsepe ay may ngalang John.

Sa isang iglap, natagpuan ko ang sarili na nakatayo sa pinto ng kastilyo, kung saan sila papasok. At nang madaanan ako ng karwaheng sinasakyan ng tatlong prinsepe, sila'y sabay na tumingin sa akin at ngumiti.

Parang huminto ang ikot ng mundo ko sa tagpong iyon. Mabilis din ang tibok ng puso ko dahil sa pagkamangha. Pagkamangha sa unang pagkakataong makakita ako ng mga tunay na prinsepe.

Tumunog ang malaking orasan matapos pumasok ang hari at reyna na magkahawak-kamay habang pinauulanan ang kanilang daanan ng mga talulot ng pulang rosas. Kasabay nito ay ang isa-isang pagyakap sa akin ng tatlong prinsepe bago pumasok sa magandang kastilyo. Iniimbitahan nila akong sumama sa kanila pero hindi ako makapaglakad.

Nakaramdam ako ng sakit sa dibdib nang hindi ko na sila masilayan sa madilim na kastilyo. Napaupo na lang ako saka nanahimik. Maya-maya, bigla akong nagising at nasilaw sa magandang sikat ng araw...

No comments:

Post a Comment

Thank you for reading!
Hope to hear from you. Don't forget to share!
Follow us on FeedBurner
Like Jay's Quirky World on Facebook! Thank you! ^_^