Intro

Mula nang una ko siyang nakita na pumasok sa klase, wala na akong ibang inisip kundi ang malaman kung ano ang pangalan niya. Sige, sabihin na nating na-love at first sight ako sa kanya.

Lalapitan ko sana siya sa puwesto niya pero biglang dumating ang adviser namin at naging pormal ang kanina lang na magulong klase. Tahimik na ang lahat.

Bilang pambungad, ipinakilala ng adviser namin ang pangalan niya, saan siya nakatira, edad, at subject na hahawakan niya para sa amin at kung ano-ano pa para lang may mai-segue.

"Now its time to introduce yourself here in front, class," nakangiting sinabi ng adviser namin.

Ayos! dahil makikilala't malalaman ko na rin kung ano ang pangalan ng kaklaseng nakukursunadahan ko!

Marami-rami pang kaklase ang nagpakilala ng kanilang pangalan hanggang sa dumating na nga ang kanyang pagkakataon para ipakilala ang sarili.

Binanggit niya ang pangalan niya na parang isang magandang musika para sa pandinig ko, ang edad niya na hindi nalalayo sa akin, at lugar kung saan ito nakatira (sayang, malayo ang bahay nila sa amin!).

Nagtamaan ang tingin namin saka ko siya nginitian. Nakakabigla dahil nginitian niya rin ako pabalik. Maraming salamat sa introduction niya dahil nalaman ko ang kanyang pangalan.