Friday, September 23, 2016

Proposal

"May sorpresa ako sa iyo."

Dumating si Christine sa parke kung saan kami nagkita ng hapong iyon. Pagkakita sa kanya, hindi ko naiwasang mamangha sa napakasimple niyang ganda. Iba sa lahat ng babaeng nakilala ko. At ang ngiting iyon, na hindi ako magsasawang pagmasdan, ay matamis na naghahaplos sa puso kong walang ibang laman kundi siya. Isa siyang tunay na babaeng ibig kong makasama hanggang libing.

"Ano iyon?" Nasasabik na tanong ni Christine sa akin.

"Malalaman mo," saka ko siya piniringan ng mata gamit ang panyo na iniregalo niya sa akin, isang taon na ang nakalipas. Saglit pa akong lumapit sa kanya at bumulong, "Magtiwala ka sa akin."

Humigpit ang kapit niya sa kamay ko saka kami naglakad. Pinagsaluhan namin ang lamig ng hihip ng hangin, pinong buhangin na aming nilalakaran, at ingay ng hampas ng alon sa baybay habang masayang nakukuwentuhan tungkol sa mga masasayang alaala ng aming pagsasama tulad ng una naming pagkikita, panliligaw ko sa kanya, matamis niyang 'Oo' sa akin, unang date, unang away, at batian.

"Gusto mo na bang makita ang sorpresa ko para sa iyo?" Pagpuputol ko ng masayang kuwentuhan.

"Oo. Sige. Kinakabahan ako!" Masayang sagot ni Christine.

Ipinaharap ko siya sa gawing kanluran kung saan tanaw ko ang sunset at dagat. "Napakaganda pero malungkot," sabi ko sa sarili.

Dahan-dahan kong tinanggal ang piring sa kanyang mata. Maya-maya, napahawak siya sa kanyang dibdib at napatakip ng labi, siguro sa sobrang saya, nang makita niya ang mga katagang, "CHRISTINE, WILL YOU MARRY ME?"

"Yes, Jerico! Yes! I will marry you!"

Yumakap siya ng mahigpit matapos maisuot ang proposal ring. Naaalala ko ang yakap na iyon na sobrang init at higpit na magpapasigurong hindi kami mawawala sa isa't isa. Nakakamiss.

"Salamat! Maraming salamat!" Sabi ni Christine sa akin.

"Syempre, para sa iyo, lahat gagawin ko! I promise!"

"Salamat, Pareng Jay!" Si Jerico, habang masayang nakahawak sa kamay ni Christine.

Aray.

"Congratulations!" Ngumiti ako kahit masakit. Best wishes for you, Christine and Jerico!"

No comments:

Post a Comment

Thank you for reading!
Hope to hear from you. Don't forget to share!
Follow us on FeedBurner
Like Jay's Quirky World on Facebook! Thank you! ^_^