Wednesday, September 21, 2016

Santong Kabayo

"Balong, kumusta?"

Siya si Tita Rita Faltoyano. Maganda, konserbatibo, mabait, nakasalamin, di makabasag pinggan, laging masaya, mapag-alaga kay pinsan, at...

"Halika, magbasa tayo ng Bibliya!"

Teka, nasabi ko ba kanina na siya ay maka-Diyos din?

Ngumiti lang ako bilang pagtanggi. At habang abala sila sa paglipat ng pahina ng Bibliya, nagpatuloy ako sa pagtingin ng mga photo album nila papa noong kabataan nila sa sala. Lihim akong natatawa sa mga itsura nilang nakangiti at bungal sa litrato. No exception, mula panganay hanggang bunso, lahat sila ay tila mga mukhang Chaka Dolls!

Maya-maya, nagulantang ako sa mga malulutong na mura ni tita, habang hawak ang Bibliya, para kay pinsan na di sinasadyang matapon ang pulbos ng pinapapak na Milo chocolate. Doon nanginig sa takot si pinsan nang makitang hawak na ni tita ang kapaki-pakinabang niyang bakya.

Kinagabihan, nakatulog si pinsan na may tadtad ng pasa ng bakya sa iba't ibang parte ng kanyang katawan. Nanginginig, humihikbi, at lumuluha, habang yakap ang maliit niyang unan na isang taon nang hindi nalalabahan.

No comments:

Post a Comment

Thank you for reading!
Hope to hear from you. Don't forget to share!
Follow us on FeedBurner
Like Jay's Quirky World on Facebook! Thank you! ^_^