Music Trip

Nakaupo ako noon sa klase. Walang magawa.

Maingay ang buong paligid. May mga kaklaseng nagtatawanan at nagdadaldalan samantalang ako, walang kausap.

Kinuha ko ang panulat at papel saka ako nagsulat ng journal. Hindi ako makapagsulat nang maayos. Magulo ang buong klase.

Andaming walking destruction.

Hindi ko magawa ang gusto kong gawin. Kahit bulong lang ng katabi ay dinig na dinig ko. Nakakairita.

"Hoy!" napahinto ako sa pagsusulat na siyang pilit kong inatupag dahil wala talagang magawa. "Mahilig ka ba sa music?" tanong niya.

"Oo," sagot ko agad pero hindi ako mahilig sa music. Ayoko ng maingay. Pero si crush ito, hindi puwedeng tumanggi!

"Good! Let's have a music trip!" alok niya na siya kong tinanggap . . . kahit hindi ako music lover.

Kumabog ang dibdib ko nang tumabi siya sa akin, hindi ko alam ang gagawin.

Isinalpak niya ang isang earphone niya sa akin saka kami nakinig ng music.

Pinagpawisan ako nang malala. Kinakabahan ako at bumibilis ang tibok ng puso ko.

Ninanamnam niya ang bawat beat ng music. Pero ako, lihim nang kinikilig habang katabi ko siya.