Kapangalan

Kasalukuyan akong nag-eencode ng mga pangalan ng mga elementary student nang makita ko ang pangalan mo sa listahan. Kapangalan mo lang naman ito at hindi naman talaga ikaw.

Matagal na kitang kinalimutan at mabuti na rin ang lagay ko pagkatapos nating magkahiwalay. Pero nang makita ko na nga itong pangalan mo, bigla kitang naalala...at namiss.

Alam mo, halos masiraan ako ng pag-iisip nang iniwan mo ako dahil sa kanya. Paano naman kasi, ikaw lang talaga ang minahal ko nang todo (yung tipong wala na akong itinira para sa sarili) pero hindi naman naging tayo sa huli. Ang sakit lang.

Pero, kumusta ka na kaya ngayon? Malamang, masaya ka sa sinasamahan mo ngayon pagkatapos mo akong iwanan dahil sa mas magaling siya sa ka--

--teka nga, kayo pa rin ba hanggang ngayon? Kasi kung totoo ang isang chismis na narinig kong iniwan ka na ng taong ipinagpalit mo sa akin, aba, tatawanan talaga kita! Karma is real, eh?

Kinopya ko ang pangalan ng estudyanteng kapangalan mo saka inencode sa spreedsheet. Ngumiti ako pero pilit nga lang. Sana, kapag dumating man ang araw na iibig ang estudyanteng ito na kapangalan mo, e hindi siya magiging katulad mo dahil kung hindi, ngayon pa lang, isusumpa ko na 'tong batang ito.