Nawawalang Brief

Isang Calvin Klein, dalawang Jockey at Lee, at apat na Bench--siyam na brief ito na nakasampay o isinabit lang sa ibabaw ng higaan ko, sa paanang bahagi. Nabigla ako kasi ang daming brief!

'Ang rarangya naman nila,' sabi ko, 'kasi pati mga gamit nilang brief, branded!' Hiyang-hiya sa kanila ang Walker kong brief. Siguro, ibinabandera lang nila iyon para ipagyabang. Pero bakit sa lugar ko pa nila inilagay?

Bago ko pa napansing maraming brief ng mga kasamahan ko ang nasa lugar ko, marami nang nananawagan sa formation namin na may nawawalan ng brief. Naisip ko, baka napagtripan siyang nakawan ng brief para umaalog ang bayag niya kapag tumatakbo. O kaya naman, baka hindi na (o hindi pa) ibinabalik ng humiram. O ang malala, baka may 'kloseta' sa isa sa mga kasamahan namin (dahil all-boys kami) at doon iniraraos ang pagnanasa.

Inilapit ko na sa kanila ang concern ko na baka sa kanila nga ang mga brief na iyon pero nang usisain nila, hindi raw iyon sa kanila.

Sa kabilang banda, tanong pa rin ako nang tanong sa mga kasamahan ko kung kaninong mga brief ang nasa paanan ng higaan ko pero wala pa ring umaangkin sa mga iyon. Halos dalawang linggo na kasing naroon. Iniwan ko iyon noong pasko at, surprisingly, naroon pa rin sila pagsapit ng bagong taon!

Ayoko ng may ibang gamit sa sinasakupan ko dahil magulo na nga ang buhay ko, magulo pa pati lugar ko. Hindi rin ako nakatiis na muling magsalita sa formation namin para manawagan na sana, kunin na nila ang mga brief nila sa higaan ko--kung kanila man ang mga iyon--dahil ayoko na ng makalat.

Walang umiimik kaya nagbanta na ako, "Itatapon ko kung hindi n'yo kukunin. Bahala na kung sino sa inyo ang mawawalan ng brief dahil hindi na ako magpapahiram!"

At pagkatapos, nawala rin ang mga brief sa higaan ko pagsapit ng gabi.